Аҳли кормандони беморхонаи касалиҳои сирояткунандаи шаҳри Хуҷанд Рӯзи кормандони соҳаи тибро таҷлил намуданд.
Дар маҷлиси тантанавии кормандони бемерхонаи сироятӣ Раиси шаҳри Хуҷанд Маъруф Муҳаммадзода ва раиси Кумитаи иҷроияи Ҳизби Халқии Демократии Тоҷикистон дар шаҳри Хуҷанд Маликисломӣ Наим Мунаввар ширкат варзиданд.
Раиси шаҳри Хуҷанд Маъруф Муҳаммадзода дар баромади худ аз таваҷҷуҳи пайвастаи давлату Ҳукумат ҷиҳати рушду инкишофи соҳаи тиб иттилоъ дода аз ҷумла таъкид дошт, ки дар ҳақиқат рушди бомаром ва ҳадафмандонаи соҳаи ҳифзи сиҳатии омма ҷиҳати баланд бардоштани сатҳу сифати хизматрасонии тиббӣ, ҷорӣ намудани усулҳои муосири табобат ва тавсеаи шаклҳои мухталифи хизматрасонӣ, ки ҷавобгўи ҳадафи стратегии мамлакат – беҳдошти саломатии сокинон, таблиғи тарзи ҳаёти солим, шароити мусоид фароҳам меорад.
Мусаллам аст, ки фаъолияти самаранок ва ҳадафманди ташкилоту корхонаҳо, аз ҷумла муассисаҳои тиббии кишвар бидуни фароҳам овардани заминаи мусоиди моддиву техникӣ ғайриимкон аст.
Таъкид шуд, ки Асосгузори сулҳу Ваҳдати миллӣ Пешвои миллат, Президенти мамлакат муҳтарам Эмомалӣ Раҳмон дар сиёсати иҷтимоии худ навсозиҳоро дар соҳаи тандурустӣ самти афзалиятнок арзёбӣ намуда, маблағгузориро ба ин соҳаи ҳаётан муҳим сол аз сол афзоиш дода, шароити инфрасохтори соҳаро ба талаботи замон мутобиы гардонида истодаанд. Айни ҳол тавассути амалӣ гардонидани тадбирҳои зарурӣ дастрасии кӯмакҳои аввалияи тиббию санитарӣ ба аҳолии кишвар тавсеа ёфта, бунёди иншооти муосири тиббӣ ва таъмин намудани онҳо бо технологияҳои навтарини ташхису табобат бомаром идома дорад.
Маъруф Муҳаммадзода дар анҷоми суханронии худ изҳори боварӣ намуд, ки кормандони соҳаи тандурустии шаҳр барои баланд бардоштани дараҷаи хизматрасонии тиббӣ ва ба ҳаёт татбиқ кардани тарзу усулҳои нав ба нави муолиҷа, мустаҳкам гардондани саломатии халқ, пешгирии интишори бемориҳо кӯшиши бештар ба харҷ медиҳанд ва ҷашни 30-солагии Истиқлолияти давлатии Ҷумҳурии Тоҷикистонро бо дастовардҳои назаррас пешвоз мегиранд.
Баъдан, Раиси Кумитаи иҷроияи Ҳизби Халқии Демократии Тоҷикистон дар шаҳри Хуҷанд Маликисломӣ Наим Мунаввар ҳамаи кормандони беморхонаро ба муносибати Рӯзи кормандони саҳаи тиб табрику муборакбод намуда, ба онҳо дар ҷодаи фаъолияти кориашон барору комёбиҳо таманно намуд.
Сипас ба фаъолони соҳа сипосномаву туҳфаҳои хотиравии Мақомоти иҷроияи ҳокимияти давлатии шаҳр ва ифтихорномаву сипоснома, туҳфаҳои Кумитаи иҷроияи ҲХДТ дар шаҳри Хуҷанд ба табибони пешқадам супорида шуд.
