Ҷаласаи Шӯрои ҷамъиятии шаҳри Хуҷандро Раиси Шӯрои ҷамъиятӣ Раҷаббой Аҳмадзода ифтитоҳ намуда, ба аъзои шӯро маълум сохт, ки дар ҷаласа се масъала мавриди баррасӣ ба муҳокимаронӣ қарор мегирад. Масъалаи якум, оид ба тасдиқи ваколати аъзои Шӯрои ҷамъиятӣ, ки намояндаи худро дар Шӯрои ҷамъиятӣ иваз намудааст, пешбинӣ шудааст. Ба сабаби вафоти Ҳошим Осимов, раиси собиқадорони ҷангу меҳнат Мӯъминҷон Орифов ва бо сабаби иваз шудани ҷойи кори Зулфия Умарова, вазифаи котиби ҳамонҳангсози Шӯрои ҷамъиятӣ бар уҳдаи сармутахассиси шӯъбаи рушди ҷомеа ва робита бо ҷомеаи шаҳр Умеда Сайдуллоева вогузор карда шавад. Оид ба ин масъала Қарор қабул гардид. Масъалаи дуюм, оид ба нақшаи фаъолияти Шӯрои ҷамъиятии шаҳри Хуҷанд барои соли 2016 пешниҳод ва бо қарор тасдиқ гардид. Аъзои Шӯрои ҷамъиятӣ вазифадор гардид, ки баҳри амалӣ намудани нақшаи кори Шӯро тадбирҳои мушаххас андешад. Аз рӯйи масъалаи сеюм, оид ба рафти иҷрои Қарори Раиси шаҳри Хуҷанд аз 12-уми январи соли 2012, таҳти №16, «Дар бораи амалӣ намудани «Барномаи давлатии рушди соҳаи тарбияи томактабӣ барои солҳои 2012-2016 дар Ҷумҳурии Тоҷикистон» Илҳом Султонов, мудири шӯъбаи маорифи шаҳр ахбори муфассал дод. Аз ҷумла, мудири маориф зикр кард, ки айни ҳол дар шаҳри Хуҷанд 37 муассисаи таҳсилоти томактабӣ, аз он ҷумла, 30 муассисаи таҳсилоти томактабии давлатӣ ва шаш муассисаи таҳсилоти томактабии хусусии «Дилоро», «Раҳматулло», «Офтобак», «Гулноз», «Раҳнамо», «Навбаҳори Хуҷанд», 1 комплекс кӯдакистон-мактаби махсус барои кӯдакони қувваи босираашон суст ва нобино фаъолият менамоянд. Дар маҳаллаи Сари Баландӣ барқарорсозии кӯдакистони №16 барои 200 нафар кӯдак, барқарорсозии кӯдакистони №4 барои 100 нафар кӯдак давом дорад. Дар микроноҳияи 3-юми маҳаллаи Темурмалик бо иштироки Раиси вилояти Суғд Абдураҳмон Қодирӣ ва Раиси шаҳр Раҷаббой Аҳмадзода барои 360-нафар кӯдак як муассисаи замонавии томактабӣ ба истифода дода шуд. Таҳлилҳои оморӣ нишон медиҳанд, ки дар шаҳри Хуҷанд дар соли 2015 аз 22000 кӯдаки синни томактабӣ 9137 нафар ба муассисаҳои томактабӣ фаро гирифта шудааст, ки ин 41,6%-ро ташкил медиҳад. Дар муассисаҳои таҳсилоти томактабӣ 414 нафар мураббӣ ва омӯзгор, аз ин шумор 207 нафар бо маълумоти олӣ, 72 нафар бо маълумоти олии нопурра, 101-нафар бо маълумоти миёнаи махсуси томактабӣ, 34 нафар бо маълумоти миёнаи махсус фаъолият мебаранд. Барои баланд бардоштани маҳорати касбӣ дар соли равон 4 нафар мудири кӯдакистон, 32 нафар мураббӣ аз курси бозомӯзии такмили ихтисос гузаштанд. ҳамчунин баҳри баланд бардоштани маҳорат ва малакаи омӯзгорӣ 83 нафар мураббии ҷавон ба мураббиёни пуртаҷриба вобаста карда шуданд. Мувофиқи маълумотҳое, ки аз «Барномаи давлатии рушди соҳаи тарбияи томактабӣ барои солҳои 2012 - 2016 дар Ҷумҳурии Тоҷикистон» бармеояд, то соли 1992 дар шаҳри Хуҷанд 56-муассисаи таҳсилоти томактабӣ фаъолият дошт, ки аз онҳо 39 кӯдакистон тобеъи шуъбаи маориф, 17 кӯдакистон тобеъи ташкилоту корхонаҳо буданд. Аз 39 кӯдакистони тобеъи шуъбаи маориф 7 кӯдакистон аз фаъолият бозмондааст. Аммо, мутассифона, айни замон аз 17 кӯдакистони тобеъи корхонаву ташкилотҳо, танҳо 1 кӯдакистони хусуси №5-и «Дилоро» тобеъи ҶС «Зиннат» фаъолият дораду бас. Тавре дар боло зикр намудем,-афзуд Илҳом Сулотонов,- то имрӯз дар муассисаҳои таҳсилоти томактабии шаҳр 9137 нафар кӯдакон ба таълиму тарбия фаро гирифта шудааст, ки дар муқоиса бо соли гузашта ба 286 нафар зиёд мебошад. Соли равон аз муассисаҳои таҳсилоти томактабӣ 1070 нафар кӯдак ба мактаб равона карда шуд. Шумораи кормандон дар 31 муассисаҳои томактабӣ 1151 нафар, дар 6 кӯдакистонҳои хусусӣ 79 нафар, дар умум 1230 нафарро ташкил медиҳад. Дар ин давра мувофиқи банди сеюми Барномаи рушди соҳаи тарбияи томактабӣ, боми кӯдакистони №25, боми ошхонаи ширхоргоҳ-кӯдакистони №26, боми ошхонаи ширхоргоҳ–кӯдакистони №36, ошхона, анбори маводи озуқа, роҳравҳои комплекс кӯдакистон–мактаби махсус барои кӯдакони қувваи босираашон суст ва нобинои №30 аз таъмир бароварда шуда, тарҳи бино, 3–гурӯҳи аз фаъолият бозмондаи ширхоргоҳ–кӯдакистони №29 бо дастгирии Мақомоти иҷроияи ҳокимияти давлатии шаҳри Хуҷанд таъмир карда шуда, ба фаъолият шурӯъ гардид. Баҳри амалигардонии «Барномаи давлатии рушди соҳаи тарбияи томактабӣ барои солҳои 2012-2016» дар Ҷумҳурии Тоҷикистон бо дастгирии Мақомоти иҷроияи ҳокимияти давлатии шаҳри Хуҷанд ба муассисаҳои таҳсилоти томактабӣ 60 адад компютер, 30 адад принтер, 30 адад принтер 3х1, 60 адад ҒPS 650 VA, ноутбук 5 адад, гӯштқимакунаки барқӣ 5 адад, деги барқӣ 11адад, плитаи барқӣ 17 адад, яхдон 30 адад, тобаи барқӣ 1 адад, тафдон 2 адад дастрас карда шуд. Бо мақсади беҳтар намудани шароити зист ва баланд бардоштани ғизонокии маводи озуқа барои кӯдакон соли 2015-ум Раиси шаҳр Раҷҷаббой Аҳмадзода аз ҳисоби буҷа 858000 сомонӣ ҷудо намуд,- изҳор кард мудири маориф. Дар муассисаҳои таҳсилоти томактабии шаҳр омӯзиши «Барномаи давлатии такмили таълим ва омӯзиши забонҳои русӣ ва англисӣ барои солҳои 2015-2020» ба роҳ монда шудааст. Айни ҳол 31 омӯзгори соҳибтаҷрибаи забони англисӣ ва 35 омӯзгорӣ забони русӣ ба тарбиягирандагон бо истифодаи воситаҳои техникӣ, маводи аёнӣ, фиттаҳои омӯзишӣ, маводи намоишӣ ва тақсимотӣ ба таълиму тарбия машщул аст. Омӯзгорон дониши худро дар иттиҳодияҳои методӣ сайқал медиҳанд, мувофиқи нақшаи корӣ ва барномавӣ фаъолияти хешро пеш мебаранд. Раванди татбиқи «Барномаи давлатии рушди соҳаи тарбияи томактабӣ барои солҳои 2012 - 2016» дар Ҷумҳурии Тоҷикистон» дар муассисаҳои томактабии шаҳри Хуҷанд бомаром идома дорад. Аҳли маорифи шаҳр дастуру роҳнамоиҳои Пешвои миллат, Президенти Тоҷикистон, Ҷаноби Олӣ, муҳтарам Эмомалӣ Раҳмонро сармашқи кори хеш қарор дода, барои боз ҳам баланд бардоштани сатҳи таълиму тарбия талош хоҳанд кард. Раиси Шӯро Раҷаббой Аҳмадзода, ахбори мудири маориф Илҳом Султоновро шунида, арз намуд, ки аз сад 60 фисади кӯдакон дар хона тарбия мегиранд. Мақомоти иҷроия талош бар он дорад, ки кӯдакистонҳои нав бунёд намуда, шумори зиёди кӯдаконро ба боғчаҳо ҷалб намояд. Дар интихоби кадрҳо низ талабот бояд ҷиддӣ бошад. Наим Маликисломов, Раиси ҲХДТ дар шаҳри Хуҷанд таклиф гузошт, ки шумори кӯдакони берун аз шаҳр, ки дар муассисаҳои томактабии шаҳри Хуҷанд тарбия меёбанд, муқаррар карда шавад, зеро Мақомоти иҷроияи ҳокимияти давлатии шаҳри Хуҷанд аз буҷа барои таълиму тарбияи кӯдакони шаҳри Хуҷанд маблағгузорӣ мекунад. Таклифи дигари Н.Маликисломов доир ба хӯроки умумии кудакон аст. Хӯрок барои 5-8 кӯдакистон пухта шуда, баъдан тақсим карда шавад. Шояд ин таҷриба натиҷаи хуб диҳад. Бо иловаи ин таклифҳо Қарори Раис қабул гардид. Эҳсон Fанихӯҷаев, комиссари ҳарбии шаҳри Хуҷанд «Дар бораи уҳдадории умумии ҳарбӣ ва хизмати ҳарбӣ» ба ҳозирин ахбор дод. Зимни маълумот арз кард, ки кимиссатиати ҳарбӣ барои ҷалби ҳарчи бештари ҷавонони синни даъватӣ ба хизмати ҳарбӣ чораҳои мушаххас андешида истодааст. Муқим Қобилов, сардори Шӯрои собиқадорони ҷанги Афғонистон изҳори нигаронӣ намуд, ки ташфиқоту тарғиботи хизмати иштирокчиёни ҷанги Афғонистон хеле кам ба чашм мерасад.Аз ин рӯ, вохӯриву мулоқотҳои аъзои Шӯроро ташкил намудан лозим, то ҳисси ватандӯстиву ҷавонмардии насли наврас такмил ёбад. Ахбори Эҳсон Fанихӯҷаев ба инобат гирифта шуда, қарор қабул гардид. Раиси Шӯро Раҷаббой Аҳмадзода, аъзои Шӯроро ба корҳои созандаву бунёдкорона баҳри амалӣ гардидани дастуру супоришҳои Пешвои миллат, Президентит кишвар, муҳтарам Эмомалӣ Раҳмон, дастуру супоришҳои Раиси вилояти Суғд муҳтарам Абдураҳмон Қодирӣ даъват намуд ва ба кори ҷаласа хотима бахшид.